სამართლებრივად და ყველანაირი კუთხით არის აბსოლუტურად უსუსური არგუმენტაცია, რასაც ვხედავთ ვენეციის კომისიის დასკვნაში. უფრო სწორად რომ ვთქვათ, იქ საერთოდ არ არის არგუმენტაცია წარმოდგენილი, – ამის შესახებ საქართველოს პრემიერ-მინისტრმა ირაკლი კობახიძემ პირველი არხის გადაცემაში „გადაწყვეტილება” განაცხადა.
მთავრობის მეთაურის თქმით, კანონმდებლობის თანახმად, იუსტიციის სამინისტროსთვის მინიჭებული უფლებამოსლიება არის ის მინიმალური ბერკეტი, რითაც სახელმწიფოს შეუძლია უზრუნველყოს არასამთავრობო ორგანიზაციების საქმიანობის გამჭვირვალობა.
„ერთი მარტივი მაგალითი რომ გითხრათ, რაც შეეხება იუსტიციის სამინისტროს ფუნქციებს და მის უფლებებს მონიტორინგის კუთხით. მაგალითად, პოლიტიკურ პარტიებთან მიმართებით, შესაბამის სახელმწიფო უწყებას, ამ შემთხვევაში ანტიკორუფციულ ბიუროს აქვს ბევრად უფრო ფართო შესაძლებლობები და 1997 წლიდან დღემდე არასოდეს გამხდარა ეს ყველაფერი არც პრობლემის საგანი და მითუმეტეს, არანაირი განხილვის თემა. 1997 წლიდან პრობლემები არ შექმნილა ანუ. რაც შეეხება იმ ბერკეტებს, რაც აქვს მინიჭებული იუსტიციის სამინისტროს, ეს არის მინიმალური ბერკეტი, რომლითაც სახელმწიფოს შეუძლია უზრუნველყოს არასამთავრობო ორგანიზაციების საქმიანობის გამჭვირვალობა. ათას აბსურდზე იყო საუბარი, რომ თითქოს ინტიმურ ცხოვრებაში შეუძლია შეიჭრას იუსტიციის სამინისტრო და ა.შ. იმდენად ღიმილისმომგვრელის მიღმაა ასეთი განცხადებები. ზუსტად იგივე ბერკეტები, მეტი აქვს მინიჭებული მაგალითად ანტიკორუფციულ ბიუროს პოლიტიკურ პარტიებთან მიმართებით და არასოდეს არავინ შეჭრილა სხვა პირთა ინტიმურ ცხოვრებაში. სრული აბსურდია, სასაცილოც კი არ არის ეს ყველაფერი, რასაც ამბობდნენ კონკრეტული „ენჯეოშნიკები” საქართველოში. გასაგებია, მათ აქვთ სუბიექტური ინტერესი, მაგრამ იმავეს რომ კითხულობ ვენეციის კომისიის დასკვნაში, ეს მართლა ყველა ზღვარს სცილდება. ეს ნიშნავს პროფესიულ ეთიკასა და ღირსებაზე უარის თქმას, რაც პირდაპირ იკითხება ვენეციის კომისიის დასკვნაში,”- აღნიშნა პრემიერმა.