![](https://newspress.ge/wp-content/uploads/2024/06/9-8.jpg)
გარემოს დაცვისა და სოფლის მეურნეობის სამინისტროს გარემოსდაცვითი ზედამხედველობის დეპარტამენტის თანამშრომლებმა, ბრაკონიერობასთან ბრძოლის ფარგლებში, ელექტროშოკური მოწყობილობით უკანონო თევზჭერის 3 ფაქტი გამოავლინეს.
2 სამართალდარღვევა გამოვლენილია ქვემო ქართლში, მდინარე მტკვარზე.
მარნეულის მუნიციპალიტეტის სოფელ მეორე ქესალოს მიმდებარედ, სამართალდამრღვევები უკანონო თევზჭერას გასაბერი ნავიდან, აკრძალული იარაღის – ელექტროშოკური მოწყობილობის გამოყენებით ახდენდნენ. მათ უკანონოდ ჰქონდათ მოპოვებული სხვადასხვა სახეობის 44 კგ თევზი.
გასაბერი ნავისა და ელექტროშოკური მოწყობილობის გამოყენებით ახდენდნენ უკანონო თევზჭერას მოქალაქეები გარდაბნის მუნიციპალიტეტის სოფელ ყარათაქლას მიმდებარედაც.
sამართალდამრღვევებს უკანონოდ ჰქონდათ მოპოვებული სხვადასხვა სახეობის 38,1 კგ. თევზი.
უკანონო თევზჭერის 1 ფაქტი აღკვეთილია მცხეთის მუნიციპალიტეტის სოფელ ქსნის მიმდებარედ. მოქალაქეები ელექტროშოკური მოწყობილობით უკანონო თევზჭერას, მდინარე ქსანზე ახდენდნენ.
ვინაიდან სამივე ფაქტი შეიცავს სისხლის სამართლის დანაშაულის ნიშნებს, მასალები, შემდგომი რეაგირების მიზნით, შესაბამის უწყებებში გადაიგზავნა.