მშვიდობის სანაცვლოდ, ბიძინა ივანიშვილის პოლიტიკური სადამსჯელო ღონისძიება გრძელდება. შვეიცარიულმა ბანკმა, რომელიც 29 აპრილამდე ბიძინა ივანიშვილთან კანონის სრული დაცვით თანამშრომლობდა, ბიძინა ივანიშვილის მიერ 29 აპრილს გლობალური პარტიის საჯარო მხილების შემდეგ მასთან კანონიერი დამოკიდებულება უკანონოდ შეცვალა, – ასე ეხმიანება „ხალხის ძალის“ წევრი თამთა მეგრელიშვილი „ქართული ოცნების“ საპატიო თავმჯდომარის, ბიძინა ივანიშვილისთვის შვეიცარიული ბანკის, Julius Baer-ის მიერ პოლიტიკური შანტაჟის მოწყობის ფაქტს.
მისივე თქმით, შვეიცარიულმა ბანკმა Julius Bear-მა ბიძინა ივანიშვილის მიერ გლობალური ომის პარტიასთან ღიად დაპირისპირების შემდეგ მისთვის პრობლემების ხელოვნურად შექმნა დაიწყო.
„მშვიდობის სანაცვლოდ, ბიძინა ივანიშვილის პოლიტიკური სადამსჯელო ღონისძიება გრძელდება. შვეიცარიულმა ბანკმა, რომელიც 29 აპრილამდე ბიძინა ივანიშვილთან კანონის სრული დაცვით თანამშრომლობდა, ბიძინა ივანიშვილის მიერ 29 აპრილს გლობალური პარტიის საჯარო მხილების შემდეგ მასთან კანონიერი დამოკიდებულება უკანონოდ შეცვალა. ბანკის მიერ ხელოვნური პრობლემების შექმნას (გადარიცხვების დაბლოკვა, ინფორმაციის დამალვა და ასე შემდეგ)… წინ უსწრებდა ქართული საზოგადოების წინაშე ბიძინა ივანიშვილის 29 აპრილის საჯარო გამოსვლა სადაც მან ღიად ისაუბრა საქართველოსთან მიმართებით „დიფ სთეითის“ ზრახვებსა და ზეწოლაზე.
უფრო დეტალურად კი საქმე ეხება ბანკ „ჯულიუს ბაერს“, რომელიც გარკვეული პერიოდის განმავლობაში კლიენტის წინაშე დაკისრებულ მოვალეობას ასრულებდა, თუმცა მან ბიძინა ივანიშვილის მიერ გლობალური ომის პარტიასთან ღიად დაპირისპირების შემდეგ მისთვის პრობლემების ხელოვნურად შექმნა დაიწყო. ამის საპასუხოდ ამერიკის ელჩი საქართველოში დახურულ შეხვედრებზე, ასევე, უმაღლესი თანამდებობის პირები, ევროპისა და აზიის საკითხებში აშშ-ს სახელმწიფო მდივნის თანაშემწე, ჯიმ ო’ბრაიენი თითქოს თავის მართლების რეჟიმში გადავიდნენ და აცხადებდნენ, რომ ბიძინა ივანიშვილის მხრიდან საუბარი გლობალური ომის პარტიასა და „დიფ სთეითზე“ არ იყო სწორი და მართებული. თუმცა „დიფ სთეითის“ არსებობას თავად ეს ძალებიც არ უარყოფენ და დონალდ ტრამპის სამიზნე, როგორც იცით, სახელმწიფო სტრუქტურებიდან სწორედ „დიფ სთეითის“ განდევნაა. ბიძინა ივანიშვილის ძალას, რომელიც მას ქართველ ხალხთან ერთად აქვს, გლობალური ომის პარტიის წევრები სათანადოდ ვერ აფასებენ. ბიძინა ივანიშვილი წაუგებელ თამაშს თამაშობს და „დიფ სთეითთან“ ომს ის ქართველი ხალხის სასარგებლოდ მოიგებს,“- წერს თამთა მეგრელიშვილი.