ანალიტიკოსი გია აბაშიძე, დონალდ ტრამპის ადმინისტრაციაზე „დიფ სთეითის“ გავლენაზე და მის სახეცვლილებაზე, სოციალურ ქსელში წერს. როგორც ის აღნიშნავს, მწარე რეალობის აღიარება გაცილებით სასარგებლოა, ვიდრე აშშ-ის ამჟამინდელი ადმინისტრაციასთან მოლოდინის რეჟიმში ყოფნა.
როგორც ანალიტიკოსი წერს, „დიფ სთეითი“ არსად გამქრალა და დიდი ხანი ვერც გაქრება ოფიციალური ვაშინგტონის მმართველი წრეების კაბინეტებიდან, ამიტომაც გადატვირთვის ღილაკს არავინ „დააჭერს“ საქართველოსთან ურთიერთობაში. შესაბამისად, საჭიროა, ქართულმა საზოგადოებამ, ეროვნული ინტერესების ბოლომდე დასაცავად ერთიანობა შეინარჩუნოს.
„მოსაზრებები „დიფ სთეითის“ დაუფარავ მეტამორფოზზე: ჭარბი მოლოდინები განსაკუთრებით უსარგებლოა პოლიტიკაში. წინასაარჩევნოდ, დონალდ ტრამპმა ცალკეული კამპანიებისთვის დამახასიათებელი დაპირება გასცა „დიფ სთეითის“ „ჭაობის“ სწრაფ „დაშრობაზე“, უკრაინის ომის ერთ დღეში დასრულებაზე და ა.შ. რეალობაში კი მოვლენები სხვაგვარად ვითარდება, უკრაინაში ომი ჯერ არ დასრულებულა და ვადებმა კიდევ უფრო გადაიწია. ხოლო „დიფ სთეითის“ ღრმა და მრავალწლიანი „ჭაობის დაშრობა“ არც ისე იოლია, რადგან მას შესრუტული აქვს აშშ-ისა და ევროპის უმნიშვნელოვანესი ინსტიტუტები, მართლმსაჯულების სისტემა, მედია და კვაზი არასამთავრობოები. მხოლოდ USAID-ის, NED-ისა და სხვა მავნებლური სახელმწიფო მედიისთვის დაფინანსების შეჩერება არასაკმარისია, თანაც პროცესს მუდმივად ბლოკავენ გლობალისტების ვასალი ამერიკელი მოსამართლეები. ტყუილად არ ალაპარაკდა თავად ტრამპი მის ეფემერულ მესამე ვადაზე და მისი საქმის აუცილებლად გაგრძელებაზე 2028 წლიდან. „დიფ სთეითი“ ახერხებს ეფექტურ მეტამორფოზსა და ადაპტაციას. თეთრი სახლის ახალ ხელმძღვანელობას ჰქონდა გონივრული დრო უფრო რადიკალური ნაბიჯების გადასადგმელად ვაშინგტონის ავადსახსენებელი „ჭაობის დასაშრობად“.
თუკი ამ ვერაგ კონგლომერატზე საქართველოს ხელისუფლებამ სამი წლის წინათ დაიწყო საუბარი და მას მრავალი მხრიდან უსინდისოდ ამუნათებდნენ, ტრამპის გუნდმა მოგვიანებით დაიწყო ამის საჯაროდ აღიარება, რომ „დიფ სთეითი“ ეწინააღმდეგება აშშ-ის და თავისუფლებისმოყვარე სხვა სუვერენულ ქვეყნებს. ვაშინგტონიდან ხელმძღვანელი პირები მწვავედ აკრიტიკებენ საფრანგეთში, რუმინეთში, გერმანიაში, მოკავშირე უნგრეთში კონსერვატორ ძალებზე უმსგავსო თავდასხმებს, მაგრამ მათ დასაცავად ქმედითი ღონისძიებები არ განხორციელებულა. აღარ ვაქცენტირებ ფურცელზე სტრატეგიული პარტნიორის, საქართველოს ამჟამინდელი ხელისუფლების განცხადებების დონეზე მაინც დაცვაზე გავეშებული გლობალისტური ძალების მოგერიების პროცესში. მწარე რეალობის აღიარება გაცილებით სასარგებლოა, ვიდრე ე.წ. გოდოს მოლოდინში ყოფნა შეერთებულ შტატებთან ურთიერთობის ახალ ფურცელზე. „დიფ სთეითი“ არსად გამქრალა და დიდი ხანიც ვერ გაქრება ვაშინგტონის ოფიციოზის დერეფნებიდან და კაბინეტებიდან, ამიტომაც ღილაკ „reset“-ს არავინ „დააჭერს“ საქართველოსთან ურთიერთობაში. ახლაც და მომავალშიც საჭიროა არ მოვდუნდეთ და ვიყოთ ერთიანნი ჩვენი ეროვნული ინტერესების ბოლომდე დასაცავად ამ აზვირთებულ და კიდევ უფრო ამღვრეულ გლობალურ ოკეანეში. ისტორიის მანძილზე განსაცდელი ბევრი გვქონია, მაგრამ ერისა და ბერის, მთავრობისა და მხედრობის და, უწინარესად, ღვთის შეწევნით, გადაგვიტანია“, – წერს გია აბაშიძე.