პოლიტიკურად მოტივირებული არ შეიძლება იყოს საქმე, როდესაც ადამიანს ფულს სძალავ გარკვეული მომსახურების გაწევის სანაცვლოდ, – ასე შეაფასა პარლამენტის პირველმა ვიცე-სპიკერმა, გიორგი ვოლსკიმ, „ სახელმწიფო უსაფრთხოების სამსახურის ანტიკორუფციული სააგენტოს მიერ „ნაციონალური მოძრაობის“ პოლიტსაბჭოს წევრის, ლაშა ცანავას დაკავების ფაქტი.
მისი განცხადებით, მნიშვნელობა არ აქვს, რომ ცანავა პოლიტიკური საბჭოს წევრია, თუმცა, თავად ფაქტი, რომ ოპოზიციური პარტიის ერთ-ერთი ლიდერი „ასეთ მამაძაღლობაშია“ ჩართული, სამწუხაროა.
„მნიშვნელობა არ აქვს, პოლიტსაბჭოს წევრია თუ არა, რასაკვირველია, პოლიტიკურად მხარდამჭერი არაერთი ადამიანი გამოჩნდება, თვითონ ნცაიონალური მოძრაობაც, მაგრამ შინაარსი, ამ ხალხის ისეთია, რომ წამსვლელები არიან სახელმწიფოსთან დაპირისპირების ნებისმიერ ფორმაზე.
ეს სამწუხარო ფაქტია, ზოგადად, საქართველოსთვის სამწუხარო ფაქტია, რომ პოლიტსაბჭოს წევრი, პოლიტიკური პარტიის ერთ-ერთი ლიდერი ჩართულია ასეთ მამაძაღლობაში. სამწუხაროა ისიც, რომ პოლიტიკურ ველზე, საქართველოს ოპოზიცია აღარ გააჩნია. საქართველოს ოპოზიცია პრაქტიკულად არ ჰყავს – ეს არის ექსტრემისტთა და თაღლითთა ჯგუფი, რომლებიც გაერთიანდნენ, ზოგი არჩევნებშია ჩართული, ზოგი აგრძელებს საბოტაჟის რეჟიმში ქვეყანასთან ბრძოლას“, – განაცხადა გიორგი ვოლსკიმ.
ცნობისთვის, თბილისის საქალაქო სასამართლომ „ნაციონალური მოძრაობის“ პოლიტიკური საბჭოს წევრს, ლაშა ცანავას, აღკვეთის ღონისძიების სახედ პატიმრობა შეუფარდა.
ანტიკორუფციული სააგენტოს თანამშრომლებმა ლაშა ცანავა თაღლითობის ბრალდებით დააკავეს.
სუს-ის ინფორმაციით, საქმე ეხება თაღლითობას, კერძოდ, საქართველოში ბინადრობის ნებართვის მოპოვების უზრუნველყოფის სანაცვლოდ უცხო ქვეყნის მოქალაქის ფულადი თანხის მოტყუებით დაუფლების ფაქტს.
დაკავებული ლაშა ცანავა „ნაცმოძრაობის“ ერთ-ერთი დამფინანსებელია და ლევან ხაბეიშვილის თავმჯდომარეობის დროს, მისი თანაშემწეც იყო.