ბაქოს უსაფრთხოების ფორუმში საქართველოს სახელმწიფო უსაფრთხოების სამსახურის ხელმძღვანელის, მამუკა მდინარაძის მონაწილეობა განსაკუთრებული პოლიტიკური და ინსტიტუციური სიგნალია. როდესაც ერთ სივრცეში 95 ქვეყნის სპეცსამსახურის ხელმძღვანელი იკრიბება, თითოეული მონაწილე ქვეყნის პოზიცია და ჩართულობა ავტომატურად აღიქმება როგორც სახელმწიფოს სუვერენიტეტისა და საერთაშორისო სისტემაში აქტიურობის დემონსტრაცია, – წერს „ხალხის ძალის“ წევრი თამთა მეგრელიშვილი სოციალურ ქსელში.
როგორც მეგრელიშვილი აღნიშნავს, მსგავსი ღონისძიებები მხოლოდ სტატუსის დემონსტრაციას არ ემსახურება. საქართველოსთვის ეს არის შესაძლებლობა, შექმნას უსაფრთხოების სფეროში მყარი ქსელი და უფრო ეფექტიანად დაიცვას საკუთარი ეროვნული ინტერესები.
„ბაქოს უსაფრთხოების ფორუმში საქართველოს სახელმწიფო უსაფრთხოების სამსახურის ხელმძღვანელის, მამუკა მდინარაძის მონაწილეობა განსაკუთრებული პოლიტიკური და ინსტიტუციური სიგნალია. როდესაც ერთ სივრცეში 95 ქვეყნის სპეცსამსახურის ხელმძღვანელი იკრიბება, თითოეული მონაწილე ქვეყნის პოზიცია და ჩართულობა ავტომატურად აღიქმება როგორც სახელმწიფოს სუვერენიტეტისა და საერთაშორისო სისტემაში აქტიურობის დემონსტრაცია.
მამუკა მდინარაძის მიერ ათამდე ქვეყნის წარმომადგენელთან ჩატარებული შეხვედრები ხაზს უსვამს, რომ საქართველოს უსაფრთხოების სამსახური არა მხოლოდ რეგიონული პროცესების დამკვირვებელია, არამედ აქტიური მონაწილეც.
ეს იმაზე მიუთითებს, რომ საერთაშორისო პარტნიორები მზად არიან საქართველოსთან ინფორმაციის გაზიარებისა და თანამშრომლობის გაღრმავებისთვის — საკითხებში, რომლებიც უშუალოდ გლობალური სტაბილურობისა და უსაფრთხოების ნაწილია.
საქართველოს ჩართულობა ფორუმში ცხადყოფს, რომ თბილისი აღიქმება როგორც საიმედო პარტნიორი. ეს საერთაშორისო შეხვედრა გარკვეულწილად ლეგიტიმაციის ფუნქციასაც ასრულებს: „ქართული ოცნება“ საერთაშორისო ასპარეზზე თანაბარ და მნიშვნელოვან სუბიექტად არის წარმოდგენილი.
უფრო ღრმა ანალიზისას თვალსაჩინო ხდება, რომ მსგავსი ღონისძიებები მხოლოდ პოლიტიკური სტატუსის დემონსტრაცია არ არის. საქართველოსთვის ეს არის შესაძლებლობა, რომ უსაფრთხოების საკითხებში მყარი ქსელი შექმნას და საკუთარი ინტერესები უფრო ეფექტიანად დაიცვას. პარტნიორების მხრიდან მაღალი დონის ჩართულობა მიუთითებს იმაზე, რომ ქვეყანა აღიქმება არა როგორც პერიფერიული, არამედ როგორც მნიშვნელოვანი რგოლი რეგიონულ სტაბილურობაში.
ამრიგად, ბაქოს ფორუმში საქართველოს მონაწილეობა ერთდროულად ასახავს როგორც მთავრობის ლეგიტიმაციას, ისე ქვეყნის გრძელვადიან სტრატეგიულ მნიშვნელობას უსაფრთხოების საერთაშორისო არქიტექტურაში. აღნიშნულის გარანტიას სახელმწიფო უსაფრთხოების სამსახურის ახალი ხელმძღვანელი ბატონი მამუკა მდინარაძის პროფესიონალიზმი და კომპეტენტურობა იძლევა!“ – წერს მეგრელიშვილი.