გურამ მაჭარაშვილი ელისაშვილის განცხადებაზე: რატომ უნდა მისცე ხმა „ლელოს“ და „გახარიას“ ერთობლივ კანდიდატს თბილისში ან რეგიონებში? იმისთვის, რომ გაიფიცონ და ნაგავში დატოვონ ქალაქები და ქუჩები, ავტობუსები და მეტრო გააჩერონ, უბიძგონ გაფიცვისკენ საჯარო მოხელეებს, რომლებსაც არ სურთ გაფიცვა და ა.შ.

„კახა კალაძე ამბობს, რომ ვიმუშავებ კიდევ უფრო უკეთესად, რასაც ვაკეთებდი, გავაკეთებ კიდევ უფრო უკეთესად – ეს არის წინასაარჩევნო კამპანია, ამას მაგალითებით ამბობს. კუპრაძე გამოდის და ამბობს, რასაც კალაძე აკეთებდა, იმასაც არ გავაკეთებ და რაც გაკეთებული აქვს, იმასაც გავაფუჭებო – არც ავტობუსებს ვამუშავებ, მეტროს გავაჩერებ, დასუფთავების სამსახურს გავაჩერებ, საჯარო მოხელეებს ვეტყვი ძალით, რომ გაიფიცონ და ა.შ.“, – ამის შესახებ „ხალხის ძალის“ აღმასრულებელმა მდივანმა გურამ მაჭარაშვილმა, საზოგადოებრივი მაუწყებლის პირველი არხის ეთერში განაცხადა.

მაჭარაშვილის შეფასებით, ირაკლი კუპრაძე და ალეკო ელისაშვილი მსგავსი განცხადებებით, თავიანთ ამომრჩევლებს ეუბნებიან, რომ მერად და საკრებულოებში იმიტომ უნდა აირჩიონ, რომ გაიფიცონ და უარეს მდგომარეობაში ჩააგდონ როგორც თბილისში, ისე რეგიონებში მცხოვრებლები.

„ეს ხალხი თავის ამომრჩეველს ეუბნება, რომ ამირჩიე მერად და საკრებულოში უმრავლესობა მომანიჭე იმიტომ, რომ რაც დღეს კეთდება, ისიც არ გაკეთდეს და უარეს მდგომარეობაში ჩავარდეს როგორც თბილისელები, ისე რეგიონებში, საქართველოს მოქალაქეები. ეს არის სერიოზულობა? ამიტომ ვამბობთ ზუსტად, რომ ვინც ვითომ მონაწილეობს არჩევნებში და ვითომ ცივილიზებულად უნდა მიიღოს მონაწილეობა პროცესებში, ეს ხალხიც კი ვერ ჩამოყალიბებულა იმაზე, რა უნდათ ამომრჩევლისგან. რატომ უნდა მისცე ხმა „ლელოს“ და „გახარიას“ ერთობლივ კანდიდატს ან თბილისში, ან რეგიონებში? იმისთვის, რომ შევიდნენ მერად ან საკრებულოში და გაიფიცონ და ნაგავში დატოვონ ქალაქები და ქუჩები, ავტობუსები გააჩერონ, თბილისში მეტრო გააჩერონ, უბიძგონ გაფიცვისკენ საჯარო მოხელეებს, რომლებსაც არ სურთ გაფიცვა და ა.შ.“, – განაცხადა გურამ მაჭარაშვილმა.