საქართველოს განათლების, მეცნიერებისა და ახალგაზრდობის მინისტრი გივი მიქანაძე იმერეთის რეგიონში კოლეჯ “იბერიას” და აჭარის რეგიონში კოლეჯ „ბლექსის“ ესტუმრა, სასწავლო პროცესს გაეცნო და თანამშრომლებს შეხვდა. მინისტრმა კოლეჯების ინფრასტრუქტურა დაათვალიერა და სასწავლებლების წინაშე არსებულ გამოწვევებთან დაკავშირებით კოლეჯების წარმომადგენლებისგან მიიღო ინფორმაცია.
როგორც გივი მიქანაძემ აღნიშნა, პროფესიული განათლების განვითარებისა და გაძლიერების ხელშეწყობისთვის უმნიშვნელოვანესია ინფრასტრუქტურის გაუმჯობესება და სტუდენტებისთვის თანამედროვე სტანდარტების შესაბამისი გარემოს შექმნა. სწორედ ამ მიზნით, სამინისტრო აქტიურად აგრძელებს კოლეჯების დაფინანსებას.
მინისტრი ბათუმის განათლებისა და მეცნიერების ქალაქში კოლეჯ „ბლექსის“ ახალი სასწავლო კორპუსის მშენებლობასაც გაეცნო. პროექტი 560 სტუდენტზე გათვლილ სამსართულიანი შენობისა და 50 სტუდენტზე გათვლილ საერთო საცხოვრებლის მშენებლობას ითვალისწინებს.
ახალი მასშტაბური პროექტის განხორციელების შედეგად, რეგიონს კიდევ ერთი ევროპული სტანდარტების შესაბამისი საგანმანათლებლო სივრცე შეემატება.
ქალაქ ქუთაისისა და ბათუმის კოლეჯები მსურველებს სთავაზობენ რეგიონის შრომის ბაზრის მოთხოვნების შესაბამის საგანმანათლებლო პროგრამებს. სასწავლებლებში ყოველწლიურად ასობით სტუდენტი ირიცხება, რომლებიც სასურველ პროფესიას უმოკლეს დროში ეუფლებიან.
გივი მიქანაძის ინიციატივით, კოლეჯების დირექტორებთან და თანამშრომლებთან შეხვედრები საქართველოს მასშტაბით ყველა რეგიონში გაიმართება.