„რუსეთმა პირველად გამოუშვა იუანში დენომინირებული სამთავრობო ობლიგაციები, რითაც მოიზიდა თითქმის 3 მილიარდი დოლარი და ამავდროულად განამტკიცა თავისი სტრატეგიული ფინანსური ორიენტაცია აღმოსავლეთისკენ“, – ამის შესახებ Financial Times-ი იტყობინება.
გამოცემის ინფორმაციით, რუსეთის ფედერაციის ფინანსთა სამინისტრომ გამოაცხადა 20 მილიარდი იუანის ობლიგაციების გამოშვების შესახებ, 6%-იანი და 7%-იანი შემოსავლიანობით, რომელთა დაფარვის ვადა 2029 და 2033 წლებში იწურება.
სტატიის თანახმად, ეს ნაბიჯი მოსკოვს უფრო იაფი სესხების მიღების საშუალებას აძლევს, რადგან შიდა განაკვეთები 16%-ზე მეტია.
ობლიგაციების ნახევარზე მეტი ბანკებმა შეიძინეს, რომლებმაც ბოლო წლებში იუანში ექსპოზიცია გაზარდეს ჩინეთთან ვაჭრობის წყალობით.
როგორც Financial Times-ი იტყობინება, ეს წარმოადგენს ქვეყნების იუანში სესხებაზე გადასვლის ყველაზე დიდ მაგალითს და აძლიერებს პეკინის საერთაშორისო ვალდებულებას, გააფართოოს თავისი ვალუტის გლობალური გამოყენება.
ამასთან, აღნიშნულია, რომ სანქციების ფონზე, რუსეთმა ეფექტურად გარდაქმნა იუანი ახალ სარეზერვო ვალუტად. მოსკოვი იუანში დენომინირებულ ფასიან ქაღალდებს იყენებს მზარდი ბიუჯეტის დეფიციტის დასაფარად, პეკინი კი ხედავს მტკიცებულებებს, რომ რუსეთი ინტეგრირებულია ვალუტის ინტერნაციონალიზაციის სტრატეგიაში.
ანალიტიკოსები აღნიშნავენ, რომ მომავალში რუსული კომპანიების მიერ იუანში სესხის აღების მოცულობა შეიძლება გაუტოლდეს იმ მოცულობას, რასაც ისინი ოდესღაც დოლარებში ფლობდნენ, რითაც დასრულდება რუსეთსა და ჩინეთს შორის ახალი ფინანსური წრედის ფორმირება.