ევროკავშირმა და ვიეტნამმა თავიანთი ურთიერთობები „ყოვლისმომცველი სტრატეგიული პარტნიორობის“ დონემდე აიყვანეს, რაც ევროკავშირს, დიპლომატიური სტატუსის თვალსაზრისით, აშშ-სთან, ჩინეთთან და რუსეთთან აახლოებს.
Euronews-ის ინფორმაციით, ხუთშაბათს, ევროკავშირმა და ვიეტნამმა, მნიშვნელოვანი დიპლომატიური ნაბიჯი შეუმჩნევლად გადადგეს და თავიანთი ურთიერთობა „ყოვლისმომცველი სტრატეგიული პარტნიორობის“ სტატუსამდე – ჰანოის საგარეო ურთიერთობების უმაღლეს დონემდე – აიყვანეს, გლობალური სავაჭრო დარღვევებისა და ვაშინგტონის მიერ სატარიფო რეჟიმის გამწვავების გამო მზარდი შეშფოთების ფონზე.
ეს ნაბიჯი ევროკავშირს იმავე უმაღლესი დონის დიპლომატიურ ჯგუფში ათავსებს, რომელშიც იმყოფებიან შეერთებული შტატები, ჩინეთი და რუსეთი, რაც მიუთითებს ბრიუსელის ამბიციებზე, გააძლიეროს თავისი გავლენა სამხრეთ-აღმოსავლეთ აზიის სწრაფად მზარდ საწარმოო ცენტრში.
„იმ დროს, როდესაც საერთაშორისო წესებზე დაფუძნებული წესრიგი მრავალი მხრიდან საფრთხის ქვეშაა, ჩვენ ერთმანეთის გვერდით უნდა დავდგეთ, როგორც საიმედო და პროგნოზირებადი პარტნიორები“, – განაცხადა ევროპის საბჭოს პრეზიდენტმა ანტონიო კოშტამ და დასძინა, რომ პარტნიორობა „ერთობლივი კეთილდღეობის სფეროების განვითარებას“ ეხება.
კოშტა, ჰანოიში ინდოეთში ევროკომისიის პრეზიდენტ ურსულა ფონ დერ ლაიენთან ერთად ოფიციალური ვიზიტის შემდეგ ჩავიდა, სადაც ბრიუსელმა სამშაბათს თავისუფალი ვაჭრობის შეთანხმებას თითქმის ოცი წლის განმავლობაში მიმდინარე მოლაპარაკებების შემდეგ მიაღწია.