ანალიტიკოსი გია აბაშიძე გერმანიაში პარტია „ალტერნატივა გერმანიისთვის“ (AFD) შესაძლო აკრძალვის საკითხს სოციალურ ქსელში ეხმიანება და აღნიშნავს, რომ პარტიის მზარდი მხარდაჭერის ფონზე, გერმანიაში რუსული საფრთხის, ჰიბრიდული ომისა და ეროვნული უსაფრთხოების რიტორიკა სულ უფრო მძაფრდება.
როგორც აბაშიძე აღნიშნავს, AFD სწორედ ის ძალაა, რომელიც ამ კურსს ღიად ეწინააღმდეგება.
მისი თქმით, პარტიის ლიდერი ალის ვაიდელი რუსეთთან ურთიერთობების აღდგენას, მოსკოვთან ღია დიპლომატიური არხის შენარჩუნებასა და უკრაინის ომის მოსაგვარებლად მოლაპარაკებების დაწყებას ითხოვს.
აბაშიძის შეფასებით, განსაკუთრებით მნიშვნელოვანია ის გარემოება, რომ AfD მსხვილ გერმანულ პოლიტიკურ ძალებს შორის ერთ-ერთია, რომელიც ამჟამინდელ საგარეო და გეოპოლიტიკურ კურსს მკვეთრად უპირისპირდება.
„AFD-ის აკრძალვა – დემოკრატიის დაცვა თუ „არასასურველი“ ძალის ჩამოშორება?
გერმანიაში ერთი სულ უფრო თვალსაჩინო პარადოქსი იკვეთება: რაც უფრო ძლიერდება „ალტერნატივა გერმანიისთვის“ (AFD), მით უფრო მძაფრდება რუსული საფრთხის, ჰიბრიდული ომის, დივერსიებისა და ეროვნული უსაფრთხოების რიტორიკა. AFD-ის აკრძალვის მოწოდებები გერმანიაში უკვე არაერთხელ გაისმა და კონკრეტული ინიციატივებიც არსებობდა, თუმცა ამან პარტიის მზარდ მხარდაჭერას ვერაფერი მოუხერხა. პირიქით – 6 სექტემბერს AFD-მ საქსონია-ანჰალტის არჩევნებში 43.8% მიიღო და გერმანიის ომის შემდგომ ისტორიაში პირველად გახდა რეგიონულ არჩევნებში ყველაზე ძლიერი პოლიტიკური ძალა.
ამავე დროს, გერმანიაში რუსეთთან დაპირისპირება პოლიტიკური დღის წესრიგის ერთ-ერთ მთავარ თემად იქცა. დივერსიები, რუსეთის წინააღმდეგ მიმართული ბრალდებები და ეროვნული უსაფრთხოების საკითხები სულ უფრო ხშირად გამოიყენება პოლიტიკური გადაწყვეტილებების გასამართლებლად.
სწორედ აქ იწყება ყველაზე საინტერესო: AFD სწორედ ის ძალაა, რომელიც ამ კურსს ღიად ეწინააღმდეგება. პარტიის ლიდერი ალის ვაიდელი რუსეთთან ურთიერთობების აღდგენას, მოსკოვთან ღია დიპლომატიური არხის შენარჩუნებასა და უკრაინის ომის მოსაგვარებლად მოლაპარაკებებს ითხოვს. ამასთან, გუშინ, 6 სექტემბერს, ვაიდელმა ვადამდელი ფედერალური არჩევნები ივარაუდა და განაცხადა, რომ ფრიდრიხ მერცის კანცლერის პოსტიდან წასვლას შობამდე ელოდება.
ანუ სურათი ასეთია: ამომრჩეველი AFD-ს აძლიერებს; AFD არსებული საგარეო და უსაფრთხოების კურსის შეცვლას ითხოვს; რუსეთთან დაძაბულობა კი სულ უფრო მძლავრ პოლიტიკურ არგუმენტად იქცევა. ამ ყველაფრის ფონზე კი კვლავ ისმის AFD-ის აკრძალვის მოთხოვნა.
სწორედ აქ ჩნდება ყველაზე მძიმე კითხვა: თუ საბოლოოდ „ეროვნული უსაფრთხოება“ და „რუსული საფრთხე“ გახდება იმ პოლიტიკური ძალის აკრძალვის საფუძველი, რომელსაც მილიონობით გერმანელი ამომრჩეველი უჭერს მხარს, მაშინ რას ვიღებთ – დემოკრატიის დაცვას თუ პოლიტიკური არჩევანის გაუქმებას? მით უმეტეს, როდესაც საქმე ეხება ერთადერთ მსხვილ გერმანულ პოლიტიკურ ძალას, რომელიც ამჟამინდელ პოლიტიკურ და გეოპოლიტიკურ კურსს ასე რადიკალურად უპირისპირდება.
სწორედ ამიტომ, სულ უფრო აქტუალური ხდება ეჭვი: „დიფ სთეითს“ ხომ არ სურს არა უბრალოდ AFD-ის დამარცხება არჩევნებში, არამედ იმ ერთადერთი პოლიტიკური ძალის ჩამოშორება, რომლის კონტროლიც ვერ შეძლო?
თუ ამ პროცესის საბოლოო შედეგი AFD-ის აკრძალვა აღმოჩნდა, კითხვა უკვე მხოლოდ ამ პარტიაზე აღარ იქნება – ეს იქნება კითხვა იმაზე, რამდენად დემოკრატიულია გერმანული თუ ევროპული სისტემა, რომელიც ამომრჩეველს არჩევანის თავისუფლებას მხოლოდ მანამდე უტოვებს, სანამ ის ხელისუფლებისთვის მისაღებ გადაწყვეტილებას იღებს“, – წერს აბაშიძე.