ევროპის საბჭოს საპარლამენტო ასამბლეის (PACE) საარჩევნო სადამკვირვებლო ჯგუფის ხელმძღვანელი იულიან ბულაი, რომელიც 2024 წლის არჩევნებთან დაკავშირებით რადიკალური ოპოზიციის ნარატივს სიტყვა-სიტყვით იმეორებდა, ამჯერად ოპოზიციის მიერ, ელენე ხოშტარიას „წამების“ თაობაზე ატეხილ ცრუ აჟიოტაში მონაწილეობს.
საქმე ეხება „კოალიცია ცვლილებებისთვის“ ლიდერის ელენე ხოშტარიას დაკავებას, რომელიც რეალურად პოლიციელის კანონიერი მოთხოვნისადმი დაუმორჩილებლობისა და წვრილმანი ხულიგნობისთვის ადმინისტრაციულ სამართალდარღვევათა კოდექსის 166-ე და 173-ე მუხლების შესაბამისად დააკავეს, თუმცა რუმინელი დეპუტატი თავის სოციალურ გვერდზე ელენე ხოშტარიას დაკავებას ოპოზიციის მსგავსად უსამართლოს უწოდებს და ამბობს, რომ ეს სამოქალაქო და პოლიტიკური უფლებების უგულებელყოფის კიდევ ერთი მაგალითია.
“ALDE-PACE შოკირებულია პარტია „დროას“ ლიდერის, ელენე ხოშტარიას უსამართლო დაკავებითა და მის წინააღმდეგ პოლიციის მხრიდან ძალადობით. ეს არის საქართველოში სამოქალაქო და პოლიტიკური უფლებების აშკარა და უწყვეტი უგულებელყოფის კიდევ ერთი მაგალითი“,- წერს (ALDE) ჯგუფის თავმჯდომარე და PACE-ის დელეგაციის ხელმძღვანელი, იულიან ბულაი X-ზე.
შეგახსენებთ, რომ იულიან ბულაი გახლდათ ევროპის საბჭოს საპარლამენტო ასამბლეის (PACE) საარჩევნო სადამკვირვებლო ჯგუფის ხელმძღვანელი, მაშინაც დელეგაცია რადიკალური ოპოზიციის ნარატივის შესაბამისად წერდა, რომ ოპოზიციის წევრებზე თავდასხმების, პოლიტიზებული სახელმწიფო ინსტიტუტებისა და მედიაში არსებული ვითარების თაობაზე შეშფოთებას გამოთქვამდა.