“შიმშილობის გამოცხადებით “ნაციონალურმა მოძრაობამ”, ფაქტობრივად, უარი განაცხადა იმ ფორმატზე, რაც საქართველოს პრეზიდენტმა სალომე ზურაბიშვილმა შესთავაზა”, – ამის შესახებ საპარლამენტო უმრავლესობის წევრმა, შალვა პაპუაშვილმა განაცხადა.
მისივე თქმით, შიმშილობის გამოცხადებით “ნაციონალური მოძრაობა” სალომე ზურაბიშვილს აშანტაჟებს.
„რა შერიგებაზე ან თანხმობაზეა საუბარი, როცა შანტაჟის ენით საუბრობენ, შიმშილობას აცხადებენ და მიდიან რადიკალურ ზომებზე. შიმშილობის გამოცხადებით მათ, ფაქტობრივად, უარი განაცხადეს იმ ფორმატზე, რაც საქართველოს პრეზიდენტმა, სალომე ზურაბიშვილმა შესთავაზა. ერთი მხრივ, თითქოს გამოთქვამენ მზაობას, რომ შეხვედრაზე მასთან მივიდნენ, მაგრამ, მეორე მხრივ, აშანტაჟებენ პრეზიდენტს იმით, რომ შეიწყალოს სააკაშვილი. ამ შიმშილობის მოთხოვნაა სააკაშვილის გათავისუფლება, შესაბამისად, ამ შიმშილობის ადრესატი არის საქართველოს პრეზიდენტი, რომელმაც საკუთარი უარყოფითი პოზიცია შეწყალებაზე დააფიქსირა. შესაბამისად, ეს არის დარტყმა სალომე ზურაბიშვილის ინიციატივაზე. ამით ჩანს, თუ რამდენად რთულია სიტუაცია “ნაციონალურ მოძრაობაში”, მიხეილ სააკაშვილი ფაქტობრივად, საკუთარი მხარდამჭერების შანტაჟს ახდენს თუ სპეკულირებს, როცა საკუთარი თავისუფლების საპირწონედ აყენებს მხარდამჭერების ჯანმრთელობასა და სიცოცხლეს, რაც აჩვენებს მის დამოკიდებულებას სხვების ჯანმრთელობის და სიცოცხლის მიმართ”, – განაცხადა პაპუაშვილმა.