რეგიონული პოლიტიკისა და თვითმმართველობის კომიტეტის თავმჯდომარე, სოზარ სუბარი უზბეკეთის რესპუბლიკის დელეგაციას შეხვდა, რომელშიც პარლამენტის წევრებთან ერთად, არასამთავრობო ორგანიზაციების წარმომადგენლებიც მონაწილეობდნენ.
შეხვედრის ძირითად თემას თვითმმართველობის მუშაობაში მოქალაქეთა ჩართულობის მექანიზმები და ამ კუთხით, ჩვენი ქვეყნის გამოცდილების გაზიარება წარმოადგენდა. სოზარ სუბარი სტუმრებს მოახლოებულ ადგილობრივ თვითმმართველობის არჩევნებზე და ამ მიმართულებით არსებულ საკანომდებლო ნორმებზე ესაუბრა.
შეხვედრისას, ორ ქვეყანას შორის არსებულ ურთიერთობებზე და ეკონომიკური კავშირების კიდევ უფრო გაძლიერების აუცილებლობაზე ისაუბრეს.
„უზბეკეთთან საქართველოს ურთიერთობა ამჟამად არ არის ისეთ დონეზე, რასაც ჩვენი ისტორიული ურთიერთობა იმსახურებს. ჩვენი მომავალი ეკონომიკური კავშირებისთვის ძალიან მნიშვნელოვანია ეს ურთიერთობა გაძლიერდეს და დაბრუნდეს იმ ნიშნულზე, რაც ოდესღაც გვქონდა. ეს იქნება ძალიან მნიშვნელოვანი ორივე ქვეყნისთვის”,- განაცხადა სოზარ სუბარმა.